跳至主要內容
:::

博物之島 MUSEUMS

:::

串過歷史kap想像ê流水: 「我們從河而來」多元書寫臺南水文化

2024/10/19
閱讀數 : 236

作者:Liāu Chùn-khái、Koeh Têng-ûn(國立臺北藝術大學博物館研究所)


本文以台文漢羅並用書寫,由台南女中台灣文化隊林秀珍老師審訂。

華語版:穿行於歷史與想像的流域之中: 「我們從河而來」多元書寫臺南水文化

「我們從河而來:流域千年,文化共筆」(展期2024/07/09 ~ 2024/10/13)是臺南市政府文化局《臺南400》計畫內底ê展覽,臺南市立博物館是主要ê舉辦單位,佇臺南市美術館開幕,攏總五个大子題、50个藝術家。臺南過去是一个充滿河川kap港口ê城市,展覽引chhōa觀眾朋友對地理水文環境ê角度開始思考,ko͘h透過藝術創作、翕相計畫、聲音作品看著臺南kap「水」ê關係,重新定義水對臺南來講有啥物意義、水佇臺南歷史當中是啥物角色。

 

「鯤鯓.凝望」予觀眾看著府城ê生活,kap其他四个大子題「眾神.請水」、「向海.航路」、「風土.眾聲」、「水逆.未來」相tha̍h。(臺南市立博物館提供)

 

展覽對臺南水文化開始。拄踏入去展覽間,隨看著展覽間外牆ê「鯤鯓.凝望(Khun-sin.Siòng)」策展人沈昭良kap沈裕融安排ê「神性之境」、「河道之城」、「常民之顏」、「人間之地」、「雙溪之痕」這幾个小子題,金金相府城ê生活,kā無仝時代、族群kap歷史背景ê臺南記憶連起來。

 

若水kap流:多元文化

展覽揀ê藝術品刺激觀眾思考,對無仝ê角度理解水文化。起頭ê「眾神.請水」展區,透過大型作品,引chhōa觀眾做伙蹽過臺南歷史ê水。「向海.航路」展覽間內,國際合作ê作品〈牽起流域的生命與希望〉展示「Taring Padi 流域多物種版畫工作坊」ê成果。一陣藝術家、學生kap文化工作者,佇1998年組立Taring Padi,透過集體創作ê方式表達理念。展覽團隊邀請Taring Padi 佇曾文溪溪身kap溪頭ê拔林kap茶山舉辦兩場工作坊,由少年做田人kap鄒族獵戶chhōa頭,引chhōa參與ê朋友思考有關曾文溪流域kap氣候ê議題。

 

Taring Padi 流域多物種版畫工作坊拔林場相片(臺南市立博物館提供)

 

透過行讀、共食kap議題討論,逐家kā交流ê結晶刻佇柴版畫,閣透過版畫再製ê性質,予in自由生thòaⁿ。展場內底柴版畫印ê、綿延ê旗仔,kap鄒族、西拉雅族傳統ê衫連做伙,親像kap流ê水,起造和齊ê文化風景。

 

「向海.航路」展覽間Taring Padi工作坊〈牽起流域的生命與希望〉(臺南市立博物館提供)

 

展覽mā走揣土地ê歷史。其中,藝術家高俊宏創作ê〈黃色事件〉,對N̂g Oo-kok ê 故事開始,予觀眾意識著詮釋歷史ê權力結構。N̂g Oo-kok 是日本時代嘉南地區ê頭人,捌造反、mā捌控制過曾文溪kap八獎溪ê溪頭。1974年,中華民國官方舉辦「革命事實展覽會」,kā N̂g Oo-kok 變做一个反抗殖民政府ê前陣,展出「N̂g Oo-kok頭顱還原圖」紀念伊。毋過佇研究過程中,高俊宏發現在地人記憶中ê N̂g Oo-kok 是一个誠惡質ê人。高俊宏結合歷史資料kap探訪調查ê成果,想欲挽瓜揫藤,了解「土匪」kap「革命先烈」兩个完全無仝詮釋ê歷史,mā予觀眾有權力參與歷史,佇展覽間內底囥白紙,觀眾會使kā kap「土匪」有關ê記憶寫落來,逐家攏是寫歷史ê人、mā是歷史ê一部分。

 

高俊宏〈黃色事件〉(臺南市立博物館提供)

 

倚水而生:眾生和平

水滋養萬物,展覽mā透過藝術借問萬物欲按怎共同生存。〈F/EEL〉計畫起造一个予人「感受鰻魚」(feel the eel)ê空間。藝術家羅晟文研究人kap非人ê關係,結合陳儀霏設計ê機關,共同打造出一間「感覺型密室逃脫房(Sensory-based Escape Room)」。逐个體驗ê朋友攏愛變做一隻鰻魚,面對鰻魚平常時會拄著ê危險,譬如水壩、水抽仔、污水、寄生蟲kap違法掠魚。密室內底有一个足大ê電風leh pháng,若是無細膩就會予電風絞kah oai-ko-chhi̍h-chhoa̍h,體驗ê朋友ko͘-put-jî-chiong愛khû leh塗跤sô才較好通過。

 

〈F/EEL〉感覺型密室逃脫房影片(廖俊凱 翕相)

 

除了〈F/EEL〉,mā展出藝術家舉辦教育工作坊ê成果,問囡仔「海豬欲按怎掛喙罨?」、「欲按怎幫助鰻魚hāⁿ過水壩?」,結合生態環境教育,引chhōa囡仔練習「多物種」ê思考方式。藝術家向望觀眾思考人kap其他物種ê關係,拆除人類中心ê思想,意識著人毋是主宰自然ê物種,是生態環境這个大家庭ê一部分,需要koh較謙卑,走揣kap自然共同生存ê方法。

 

 囡仔畫ê海豬喙罨設計圖(廖俊凱翕相)

 

「番薯毋驚落土爛,只求枝葉代代湠」:水ê永續

工業資本主義ê發展到今,人離環境愈來愈遠,本底是源自自然ê創作材料,經過當今科技技術製造,變成會使簡單買著ê商品。佇臺南創作ê陳瑋軒,創作〈捏地—牛〉,使用生活當中ê田塗做媒介,mā配合古早「坑燒」ê方式,提醒觀眾瓷仔藝術ê本質,思考人、藝術kap環境ê關係。

 

陳瑋軒〈捏地—牛〉相片(廖俊凱翕相)

 

晁瑞光〈人的生活進行式〉抾海邊仔ê糞埽來創作,提六條河內底無仝ê糞埽創作出造型角色,譬如phoo-lí-lóng kap 漁網組成新港溪ê「膨風阿伯」;kā浮筒仔kap農藥罐tàu起來,就變成曾文溪「愛啉飲料ê刺毛蟲」。藝術家透過趣味ê方式,予觀眾意識著海邊糞埽ê問題有偌忝頭,刺激觀眾思考環境永續ê未來。

 

晁瑞光〈人的生活進行式〉(廖俊凱 翕相)

 

李欣芫自2019年開始創作《Chí-moāi》,佇臺南kap臺南ê姐妹市San Jose做研究,採集都市文明當中「水」ê聲音。這擺展出ê〈Chí-moāi 3〉lia̍h污水處理工程做創作基礎,記錄自然環境kap環境工程ê聲音,觀眾掛耳機會使聽著機器kap gí-á高頻率ê聲、環境流水ê聲,kap一幕一幕閃過ê垃圾塗、魚仔、風景、機器特寫kap顯微鏡畫面,聽覺kap視覺相tha̍h,用聲音引chhōa視覺ê意象,對無仝角度感受水資源循環ê過程,提醒觀眾毋通袂記平常拍開水道頭就會流出來ê「水」是付出偌濟環境工程kap成本ê結果。毋但作品名字是白話字,展覽開幕ê時,李欣芫全部用台語導覽伊ê作品,本土語言佇正式ê、學術ê場合出現,希望觀眾覺醒語言意識,予觀眾認捌講本土語言是一件誠四常ê代誌,mā是臺南文化天然ê模樣。

 

李欣芫〈Chí-moāi 3〉(廖俊凱 翕相)

 

咱對河來,欲對佗去?

展覽毋但引chhōa觀眾思考未來,mā予觀眾看著臺南歷史。由國立成功大學建築系黃恩宇副教授研究團隊製造ê〈臺南原點.四百再續-17世紀荷治福爾摩沙的熱蘭遮堡壘與市鎮〉透過VR予觀眾會當拜訪四百冬前ê熱蘭遮堡,研究團隊詳細閣實在ê研究復原當時ê空間,予觀眾會當體驗彼當陣ê街仔路,團隊mā誠頂真,重現台語、英語、荷蘭語,三種語言透濫ê生活,予觀眾實實在在體會臺南四百冬以來ê發展,是多元文化kap流、粒積ê成果。

 

1640s 熱蘭遮堡壘kap市鎮復原模型(廖俊凱翕相)

 

「我們從河而來:流域千年,文化共筆」討論臺南水文化,對較闊ê角度──水體歷史出發,一步一步引chhōa觀眾看著四百冬以前臺南加入世界貿易體系ê過程,mā透過當代藝術ê表現手法,思考未來可能ài面對ê難關。向望臺南文化kap長流ê水仝款,會直直源源不絕生thòaⁿ,萬代傳承落去。

 

台文創作說明:本是多元文化、多語的台灣,因為極端的語言政策的打壓,語言所承載的精神、族群文化與生活知識,都隨著被割斷的舌頭漸漸被遺忘。筆者希望在自己的能力範圍內為「台語正常化」努力,期盼未來能自然地在各種場域、包含學術寫作,都能使用台語自在交流,chò-hóe kā lán ê gí-giân o̍h tńg—lâi!


備註:

  • 註1:用古溪名表示,八獎溪是今仔日ê八掌溪、漚汪溪是今仔日ê將軍溪、新港溪是今仔日ê鹽水溪、二層行溪是今仔日ê二仁溪。

資訊來源


本篇作者 廖俊凱、郭庭耘,其他文章

關鍵字

你會喜歡的文章